Jajca marmōrkowe…

20 marca 2015

Potrza ku tym jacōm tego:

4 jajca,

3 łyżecki listkōw czǒrnego tyju (Ulung abo cosik wele tego),

3 łyżecki sojowyj zōłzy,

2 sroge łeżki sherry (abo podanyj we gyszmaku i farbie inkszyj gorzǒły),

kielanǒście ziǒrek czǒrnych korzyni, pǒra nelkōw we cǒłkości (nō mogōm być i zemlyte nelki), pǒra ziǒrek wōniōncych korzyni, pǒra gwiǒzdek hanyżu (dziwokigo kopru), jedna maluśkǒ paprika chili, kielanǒście ziǒrek korijandera, srogǒ łeżka soli;

Terǒzki jajca trza nażgać ze jejich rubszyj zajty, wrajzić do zimnyj wody, zawarzić i uwarzić na twǒrdo we festnie łosolōnyj wodzie. Zatym trza te jajca łostudzić i potrzaskać szkorupiny ale tak coby łōne ze tych jajec niy łoblazły.

Wszyjske korzyni wymiyszać ze sia do kupy i utuc we mojżyszu abo zemlyć we mikserze. Jajca przełōżić do srogszigo gǒrka dociepnōńć tyn czǒrny tyj i cǒłke zemlyte (utuczōne) korzyni, dociepnōńć soli, dolǒć sojowyj zōłzy i sherry a na łostatki zalǒć trzima szklǒnkami wody. Warzić trza to terǒzki na małym łogniu pod deklym jakesik pōł godziny.

Uwarzōne na taki szimel jajca łostudzić, łobrać ze szkorupinōw a na wiyrchu kǒżdego jajca pokǒże brōnǒtny, marmōrkowy muster. Łobrane jajca trza terǒzki pokrǒć na pōłōwki i polǒć sojowōm zōłzōm zmiyszanōm ze zōłzǒm tabasco.

Ojgyn z Pnioków

 

czǒrny tyj – herbata czarna,

sojowǒ zōłza – sos sojowy,

korzyni – pieprz czarny,

korzyni – wszystkie przyprawy sypkie,

nelki – goździki,

wōniōnce korzyni – ziele angielskie,

hanyż (dziwoki koper) – anyżek,

korijander – kolendra,

mojżysz – moździerz,