Ajsbajn (golonkô) po pniokowymu…

30 listopada 2014

Nôjprzodzij trza narychtować:

zadni ajsbajn (tak kole 1,5 – 2 kilo wôgi);

jedna flaszka biyru;

jedna cebula, jedna srogszô markew, jedna peterzila, maluśki zeler, dwa kónski knóblocha, sól, korzyni, bobkowe liści, wóniónce korzyni i deczko vegety.

Nôjprzodzij trza tyn ajsbajn gynał łopôlić, łoszpluchtać we wodzie, łosuszyć i ponarzinać côłkô skóra. Zatym natrzić jóm solóm, korzynióma, łozgniyciónym knóblochym i wrajzić do kilszranku na jakesik 24 godziny. Na drugi dziyń trza tyn ajsbajn jake pół godziny łobwarzić do kupy ze dociepniyntmi rajn do wody bobkowymi liściami, wónióncymi korzynióma i vegetóm. Niyskorzij juzaś trza łobskwarzić ździebko na tygliku tyn ajsbajn, wrajzić do gryfnistyj brytfanki, podlôć wodóm (moge być ta ze warzyniô). Tyj wody mô być tak, coby sióngała do śćwierci tego ajsbajnu. Terôzki wrażujymy to wszyjsko rajn do bratruły i skwarzymy kajsik kole dwióch godzinów we bratrurze nasztalowanyj na 200 gradusów. Nałónczôs parszczyniô, skwarzyniô potrza tyn ajsbajn co piytnôście – dwadzieścia minutek łobrôcać i polywać wodóm spode tego ajsbajnu. Tak po jakisik godzinie skwarzyniô wciepujymy rajn rubo potrzitô markew, peterzila, zeler i rubo pokrónô cebula. Po dwióch godzinach sztalujymy bratruła na 250 gradusów i skwarzymy (już bez dekla tyj brytfany) jeszcze jakesik pół godziny ale, co pôra minutek polywómy to wszyjsko piwym tak, coby zrobióła sie szykownistô łostrô skórka.

Ojgyn z Pnioków

narychtować – przygotować,

ajsbajn zadni – tylna golonka,

peterzila – korzeń pietruszki,

knóbloch – czosnek,

bobkowe liści – liście laurowe,

korzyni – czarny pieprz,

wóniónce korzyni – ziele angielskie,

łopolić – opalić nad gazem,

łoszpluchtać – opłukać,

ponarzinać – ponacinać,

kilszrank – lodówka,

rajn – do środka, do wewnątrz,

łobwarzić – obgotować,

tyglik – patelnia,

łobskwarzić – podpiec,

brytfana – brytfanna, rynka, rynienka do pieczenia (tutaj może być żaroodporne nacvzynie),

bratruła – piekarnik,

nasztalowany – nastawiony,

gradusy – stopnie Celsjusza,

łostro skórka – chrupiąca (chrupka) skórka